Gigantvekst ut i verda frå lita bygd

Publisert: 01.12.06

Da året starta hadde selskapet Omega med hovudkontor i den vesle kreative bygda Ølensvåg 274 medarbeidarar. Nå er tilsett nr. 408 innrullert.

INTERNASJONALT: Omega har tilsette av 25 ulike nasjonalitetar og er representerte i 20 ulike land. Kenneth Steinsvik (til venstre) er dataingeniør og har hatt langvarige oppdrag mellom anna i Australia og i Canada. Til høgre, toppsjefen Petter Aalvik.

Ølensvåg

Langs den idylliske fjordarmen inn til Ølensvåg ligg den eine sterke og fullbooka verksemda etter den andre. Størst er Westcon, som kan gi arbeid til 1000 personar samtidig og tilbyr tunge produkt og tenester som skipsbygging og reparasjon av boreriggar. Inst ligg Omega, som har nær 50 tilsette ved hovudkontoret. Resten av dei 350 tilsette er spreidde på olje-, gass- og petrokjemianlegg rundt i verda. Omega sine hovudprodukt er databasert prosjektstyringsverktøy og utleige av folk som har både fag- og datakompetanse. I tillegg leiger Omega ut personell som er spesialistar på ferdigstilling av prosessanlegg.

Snøhvit

Under bygginga av landanlegget på Melkøya ved Hammerfest for mottak av gassen frå Snøhvit-feltet, har Omega på det meste leigd ut 100 av sine medarbeidarar. Statoil er Omega sin klart største kunde gjennom mange ulike prosjekt. Etter kvart har mange andre oppdragsgivarar meldt seg. -Me er representert på mest alle kontinent og hjelper til med prosjektstyring enten det er nytt petrokjemianlegg eller bygging av installasjonar som skal offshore, seier dagleg leiar Petter Aalvik.

Toppsjefen

Aalvik har leia Omega dei tre siste åra. Han er busett i Sola og har fleire kontordagar ved Omega si avdeling på Forus. Aalvik, som er utdanna skipsingeniør og med tilleggsutdanning innan økonomi og finansiering, har bakgrunn frå internasjonal konsulentverksemd. Han har også vore tilsett i Stolt Comex, Smedvig og seinare i finansbransjen.

Gründerane

Omega-eventyret starta i Ølensvag sist på 80-talet med brørne Lunde si vesle databedrift. Utviklinga av prosjektstyringsverktøyet, Pims, i kombinasjon med satsing på prosjekttenester, er blitt sjølve nøkkelen til suksess. Utviklinga av verktøyet har skjedd undervegs og i samråd med kundane. Bygginga på Tjeldbergodden sette fart i selskapet. Framleis er brørne Lunde sentrale i leiinga av selskapet og dei to største eigarane.

India og Litauen

Kenneth Steinsvik er ein av dei unge dataingeniørane i selskapet. Trass i sine knapt 24 år har han alt fleire lengre utanlandsopphold bak seg. Han har mellom anna vore i Australia i tre månader og ni månader i Canada. Kanskje blir Brasil neste stopp. Men først skal meir dataverktøy utviklast i Ølen. Det skjer i tett samarbeid med Omega sine nyskipa datamiljø i India og Litauen. -Det fungerer heilt greitt å drøfta og løysa aktuelle problem saman med kollegaene våre langt borte, seier Steinsvik, som legg til at berre ulike tidssonar kan vera praktiske hinder.

Vil veksa meir

-Veksten i Omega vil halda fram. Me vil passera 500 tilsette, men eg veit ikkje når, seier dagleg leiar Petter Aalvik. Han legg til at rekrutteringa har gått bra hittil. -Store prosjekt gir spennande oppgåver. Me er ute etter eit vidt spekter av arbeidskraft som dataingeniørar, sivilingeniørar, siviløkonomar og folk utan høgare utdanning, med med interessant arbeidserfaring. Eldre arbeidstakarar er og ein særs viktig ressurs for oss, seier Petter Aalvik.